நம்பிக்கையோடு செயல்படு, வாழ்கையில் நிம்மதி சூழ்ந்திருக்கும்..

நம்பிக்கையே வெற்றி

~ எதன் மீது எனக்குச் சந்தேகம் வந்தாலும் நிம்மதி பாழாகிறது. இது மனைவியாயினும் சரி. யாரயிருந்தாலும் சரி!

~ எது பிடிக்கவில்லையோ அதில் இருந்து ஒதுங்கி நில். ஆனால், தினமும் சந்தேகப்பட்டு உடம்பையும் மனத்தையும் கெடுத்துக் கொள்ளாதே.

~ சாப்பிட்டு முடிந்த பின், எதைச் சாப்பிட்டோமோ என்று நினைத்தால், அடிவயிற்றைக் கலக்கும். சாப்பிடுவதற்கு முன்னாலேயே நன்றாகப் பார்.

~ கல்யாணம் கட்டி சாந்தி முகூர்த்தம் முடிந்த பின் இதையா கட்டிக் கொண்டோம்’ என்று நினைத்தால் நிம்மதி அடியோடு போய்விடும்.

~ முன்னாலே யோசி. யோசித்துச் செய்த முடிவுகளில் நம்பிக்கை வை.

~ திருப்பதிக்குப் போவது என்று முடிவு கட்டினால் திரும்பி வரும்போது பலன் இருக்கும் என்று நம்பு.

~ நம்பிக்கையும் சந்தேகமும் மாறி மாறி ஊடாடினால், அப்போதும் நிம்மதி இருக்காது.

~ மீன் கூடைக்குப் பக்கத்தில் பூக்கூடையை வைத்தால் மீன் வாசமும் தெரியாது; பூ வாசமும் தெரியாது. கலப்படமான ஒரு அருவருப்பே தோன்றும்.

~ நண்பன் தீயவன் என்றால், விலகிவிடு; நல்லவன் என்றால் நம்பிவிடு.

~ விலக்கியவனை நம்பத் தொடங்காதே; நம்பியவனை விலக்கத் தொடங்காதே.

~ இன்றையப் பொழுது நன்றாக இருக்கும்’ என்று நம்பு; நன்றாகவே இருக்கும்.

~ என் மனைவி உத்தமி’ என்று நம்பு; அவள் தவறாகவே நடந்தாலும், உனக்கு நிம்மதி இருக்கும். தன் தவறுகளுக்காக அவள் இந்த ஜென்மத்தில் வெந்து வெந்து சாவாள்.

~ இறங்குகிற தொழிலில் நம்பி இறங்கு; தொழில் திறமையே உனக்கு வந்து விடும்.

~ தண்ணீரில் விழுந்து விட்டால், நீந்தத் தெரியும்’ என்று நம்பு; நீந்தத் தெரிந்து விடும்.

~ கடன் வந்து விட்டால், கட்ட முடியும்’ என்று நம்பு; கட்டிவிட முடியும்.

~ முடியாது, முடியாது’ என்பவனும், அது இல்லை, இது இல்லை’ என்று வாதிடும் நாத்திகனும் மரக்கட்டைகள்.

~ உண்டு’ என்பவனுக்கே உள்ளம் வேலை செய்கிறது.

~ எதையும் கண்ணால் கண்டால்தான் நம்புவேன், என்கிறவன் முகத்தில் மட்டுமே கண்களைப் பெற்றவன்; அகத்திலே கண்ணில்லாதவன்.

~ ஊனக் கண் ஒரு கட்டத்திலே ஒளியிழந்து போகும்; ஞானக்கண் எப்போதும் பிரகாசிக்கும்.

~ நம்பிக்கையோடு முயன்றால், சாணத்தில் தங்கம் கிடைக்கும்.

~ சந்தேகத்தோடு பார்த்தால், தங்கமும் சாணம் மாதிரித்தான் தெரியும்.

~ கல்யாணமான ஒருத்தி, பாலகிருஷ்ணன் பொம்மையை வைத்துக் கொண்டு, `வாடா கண்ணா! வாடா கண்ணா!’ என்று அழைத்துப் பார்க்கட்டும், மலடி வயிற்றிலும் மகன் பிறப்பான்.

~ திருநீறோ, திருமண்ணோ இடும்போது கடனுக்கு இடாமல் நம்பிக்கையில் இடு. அவை இருக்கும் வரை மூளை பிரகாசிக்கும்.

~ நம்பியவர் கெட்டாரா? நம்பாதவர் வாழ்ந்தாரா?

~ ஒரு தாயின் தெய்வ நம்பிக்கையால், புத்தியில்லாது இருந்த நானும் ஓரளவு புத்தியுள்ளவனானேன். என்னுடைய தெய்வ நம்பிக்கையால் நான் எதிர்பாராத அளவுக்குச் சூழ்நிலைகள் வாய்த்துள்ளன.

~ முப்பத்து மூன்று வருஷங்களுக்கு முன்னால், பத்திரிகையில் வேலைக்குச் சேர்ந்தபோது, ப்ரூப் படிக்கத் தெரியுமா?’ என்றார்கள்; தெரியும்’ என்றேன். பழக முடியும் என்று நம்பினேன். பழகிக் கொண்டேன். கவிதை எழுதத் தெரியுமா?’ என்றார்கள்; நம்பினேன். எழுதினேன்.

~ முடியும்’ என்றால் முடிகிறது; தயங்கினால் சரிகிறது.

கூந்தலை முடிக்கக் கை இல்லாதவர்களுக்குத்தானே, அது சரிந்து விழுகிறது.

~ நாளைக்குத் திருச்சி போய்ச் சேருகிறோம்’ என்று ராக்போர்ட் எக்ஸ்பிரஸில் ஏறு; அது திருச்சி போய்ச் சேர்ந்துவிடும்.

~ இதுவா? போகுமா?’ என்று சந்தேகப்படு; அது புறப்படவே புறப்படாது.

~ விழுந்த பின் எழுவதற்கு உன் கைகள் தாம் பயன்படுகின்றன என்றால், அந்தக் கைகள் இறைவனுடைய கைகள் என்று அர்த்தம்.

~ அங்கே போனால் அது கிடைக்காது; இங்கே போனால் இது கிடைக்காது என்று சந்தேகப்பட்டால், நீ எங்கேயும் போக மாட்டாய்; எதிலும் முன்னேற மாட்டாய். இருந்த இடத்தில் இருந்தே சாவாய்.

– கவியரசு கண்ணதாசன்

தங்கள் கருத்துக்களை இங்கே எழுதவும்..

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s